Kei, keimah ngei leh keimah.

Thlasik khua in mung chho tanin boruak lum a chhem dai tan a, kum khat atan a thla tawp ber rap tan dek dekin, hunpui hman dan tur tu pawn an rawtuisep chho tan a. Khai a! Kei ve chu sep tur piah lam a, a boruak in mung pawh hrechang lovin mahni kal kalin ka kal a, ka hla sak leh rilru a lut zawngte chuan ranin lam hawi chu la hlat taka a ni. Lunglenna hi ka nei tawh ngai lo emaw ka ti a, nei tak ka lo la ni reng mai. Tlai ni tlak apiang chang a min hrilh hretu ka kam lawkna ringawt pawh hian ka lo lungleng ve reng tih min hriat chhuah tir a, Lunglei tlangval (Fam) Lalzova Chhangte hla te daihin a ni rilru la luah ni. Lehkhabu chhiar nuam ka tih atanga thu leh hla (a thiam erawh thiam lo tak ka ni) a ka tui thleng, ka lehkhabu chhiar tawh a ka nun hman chhoh zel a, ka tai vawn zel 'Khawhar hnemtu' (A ziaktu hming tak ka hre ta lo mahse Aizawl chhim lam Serchhip District chhung a khaw pakhat a chhungkaw ropui chanchin a ni.) leh 'Fam Lalzova' (Pu R Lalrawna'n thuziak a thilkhawm (compile) ni ta in ka hria) te khan a tul hun a ka hman theih turin kawng min lo sial sak zel tih thlengin ka hre chhuak chhawm ve zel a. Fam Lalzova chanchin hi chu sawi lova tlak ral mai mai atan chuan ui tak ka ni. Thu leh hla a ka tui ve atangin a ni chu hmana chawl tawh ni mahse min kaihruai a, thu leh hla ah pawh abik in hla (poetry) ah nasa lehzual zawkin ka tui phah ngei mai. A ni vang hian Sap pachal Pu Byron-a (George Gordon Byron, Gordon VI- na) te, Pu Shelley-a (Percy Bysshe Shelley, a nupui pahnihna Mary Shelley (Frankenstein ziaktu) tluk lo tu) te, Pu Keats-a (John Keats a hla phuah thiam baka lehkhathawn ngaihnawm Fanny Brawne (Frances "Fanny" Brawne Lindon) hnena thawntu) te ka hmelhriat phah a, naupang te in Typhoid natna kan tih avangin a thi a, thu leh hla hlut tlak leh in hrilhchhawn zel tlak khawp min hnutchhiat hman hi a lawmawm tak zet a ni. 

Typhoid leh Tuberculosis natna sawi hi chuan thin a rim tun thin mai dawn. Kan mizo thuthiam tam tak min laksak ta, Pu L. Biakliana te, amah Tachhip khaw tlangval Pu Kaphleia te pawh naupang te in min hui kiam sak tawh a, laihren damdawi chhuak tlai te thleng hian dem mai a chakawm a ni.

A thu leh hla danglam bikna te hian sap pachal thu leh hla thleng hian a el pha hial hian ka ring a ni. A hla pakhat a, 'mitthla in ka hmu che ngaihzuali.' a tih te hian Pu Byron-a hlachham phuah, 'I saw you thee weep.' a tih te kha a han khuangrual pui thei tlat a, a hunlai ngaihtuahin a changkang in, dinhmun sang tak hauh pha a ni. A thu leh hla dan zawng, a sawi tur chuan ka la nau em a, in zir nasat ka la ngai em a, ngawih ah hei chu ka tlak zawk ang e.

American pumchhuak fiamthu thiam leh lemchan thiam Robin Williams-a thu sawi pakhat 'Mi tupawh i tawn apiangte hian an mahni buaina ral lian i hriat pui ve miah loh an bei vek a. Ngilneih chhuah reng ang che, engtik lai paw'n.' a tih te ka hre chhuak a, keimah thlengin min in enlet tir fova,  Fam Lalzova kha tiang zawng a mi tawrhpui thiam leh hriatthiam pui thiam tak a lo ni. A tan bak a mi dang tan a hla a phuah chhuah te kha.. 'Vulmawi, Chuailopari' hla te kha aw.. a zahawmin nu te thurawn la thlapin nupui neih a ngen chu a ni mai a.

A hla thunawn a, 

'Enge kan thlan ang Parte,

Aw nang lo chu;

Phuloh nghah chu khua tlaina,

Ka nu kumpui sul ang a vei min tiam a,

Kei ka tan vulmawi chuailopari.'

ti a, a nghah hun suangtuah ringawt pawh rei ve duh tak a ni.

Rilru ah thu tam tak a lang a, ziah chhuah tur a tam, ziah ngam loh lah tam bawk mahse thu ka ziah ve atanga ka thiam lo tih ka inpawm em em na, ka thuziah te'n tlangkawmna an nei ngai loh lai ka thleng leh ta der mai. Hma ka sawn mawhna pakhat chu a ni ngei mai, zir a thiam theih tur chu a niin ka hria a ka thiam thei lo lai hian ka ngaihtuah tawk lo tih pawh ka hrechiang thar leh hnuhnawh e. 

Thu leh hla hi ka rilru a buaina ral a len a, min um kir sak a, tawm himna min siam saktu, ka au rawl ka chhuah a, ka aw tawp a ka au chhuahna hmun a ni. He hmun hi i lo thleng ve a, tangkai puina i hmuh ve a, min hriat chhuah phah na a ni ve ngai a nih chuan lo leng lut la, thu muangchang la, he hmunah hian mittui tlak na te, thinrim na te, buaina ngei te pawh lo au chhuah pui ve ta che!!